Mirzacho‘lda aliment to‘lashdan qochgan ota 15 sutkaga qamaldi.

Yurtimizda bolalarning barcha huquqlari qatori moddiy ta’minot olish huquqi ham qonun bilan kafolatlangan. Xususan, yangi tahrirdagi Konstitutsiyamizning 77-moddasiga ko‘ra, ota-onalar va ularning o‘rnini bosuvchi shaxslar o‘z farzandlarini voyaga yetguniga qadar boqishi, ularning tarbiyasi, ta’lim olishi, sog‘lom, to‘laqonli va har tomonlama kamol topishi xususida g‘amxo‘rlik qilishga majburdirlar.

Ammo hayotda turli sabablarga ko‘ra, oilaning buzilishi natijasida alohida yashaydigan ota yoki onaning bola ta’minotida ishtiroki o‘ta dolzarb muammoga aylanadi.

Shuning uchun amaldagi Oila kodeksining 96-moddasida ota-onaning voyaga yetmagan bolalariga ta’minot berishi shart ekani qat’iy belgilab qo‘yilgan.

Bu hayotda farzand tarbiyasi, uning ta’minoti har bir ota-ona zimmasidagi o‘ta sharafli va ayni paytda mas’uliyatli vazifa sanaladi. Biroq hayotda ana shunday mas’uliyatli vazifani o‘z ixtiyori bilan bajarishdan bosh tortadigan ota-onalar ham uchrab turadi. Albatta, bunday vaziyatda qonun ustuvorligini ta’minlash va ta’sirchanligini oshirish maqsadida ma’muriy va jinoiy javobgarlik choralari ko‘riladi.

Sudining qaroriga asosan farzandlarining ta’minoti uchun aliment to‘lashi belgilangan bo‘lsada, ijro harakatlari davomida bir necha marotaba ogohlantirilishiga qaramasdan bo‘yin tovlab kelgan alimentdan qarzdor A.Ye.ga Byuroning Mirzacho‘l tuman bo‘limi tomonidan MJtKning 474-moddasi bilan ma’muriy huquqbuzarlik to‘g‘risidagi bayonnoma rasmiylashtirilgan. Natijada jinoyat ishlari bo‘yicha Mirzacho‘l tuman sudining qaroriga asosan 15 sutkadan ma’muriy qamoq jazosiga tortildi.

Xulosa qilib aytganda, aliment bu qarz emas, balki farzandning u voyaga yetgunga qadar beriladigan ta’minotidir. Buni bajarish esa, har bir ota-onaning burchidir.

Byuroning Mirzacho‘l tuman

bo‘limi boshlig‘i